دوحہ۔15ستمبر(اے پی پی)وزیراعظم محمد شہباز شریف دوحہ اچ ہنگامی عرب اسلامی سربراہی اجلاس دے موقع تے سعودی عرب دے ولی عہد اتے وزیر اعظم شہزادہ محمد بن سلمان بن عبدالعزیز السعود نال ملین اتے اسرائیلی جارحیت دے بعد دی صورتحال تے الایا۔ ملاقات اچ نائب وزیراعظم و وزیر خارجہ سینیٹر اسحاق ڈار اتے فیلڈ مارشل سید عاصم منیر وی موجود ہن۔ عرب اسلامی سربراہی اجلاس قطر اتے اسرائیلی حملے دی صورتحال سانڳے سݙیا ڳیا ہا۔ ݙوہیں رہنماواں اسرائیل دی جارحیت دے بعد پیدا تھیوݨ آلی صورتحال تے ڳالھ مہاڑ کیتی۔ وزیر اعظم اسرائیلی اقدام دی سخت مذمت کریندے ایکوں مشرق وسطی اچ امن رکھݨ دیاں کوششاں کوں مکاوݨ دی ہک ڄاݨ ٻڄھ تے کوشش قرار ݙتا۔ وزیر اعظم ایں اوکھے ویلھے اچ امت مسلمہ کوں ہک کرݨ تے ولی عہد شہزادہ محمد بن سلمان دی بہادر اتے چنڳی سوچ آلی قیادت دی تعریف کیتی۔ ایں سانڳے وزیر اعظم سعودی ولی عہد کوں پاکستان ولوں خاص طور تے اقوام متحدہ دی سلامتی کونسل اچ ودھ سفارتی حمایت دا یقین ݙیوایا جیںدے اچ پاکستان ایں ویلھے غیر مستقل رکن اے، ایں توں علاوہ او آئی سی سودھا ساریاں ٻیاں سفارتی کثیر الجہتی فورمز تے وی پاکستان ولوں ودھ سفارتی حمایت دا یقین ݙیوایا۔ وزیر اعظم آکھیا جو دوحہ اچ ہنگامی عرب اسلامی سربراہی اجلاس دا تھیوݨ ایں ڳالھ دا صاف سنیہا اے جو ساری دنیا دے مسلمان اسرائیل دی غیر قانونی اتے ظالمانہ جارحیت، جیڑھی علاقائی امن و سلامتی کیتے خطرہ اے، دے خلاف ہک آواز ہین۔ پاکستان اتے سعودی عرب دے تاریخی اتے ڳھاٹے برادرانہ تعلقات دا وعدہ کریندے وزیر اعظم سعودی عرب ولوں پاکستان نال ہر اوکھے ویلھے ودھ حمایت تے ولی عہد دا شکریہ ادا کیتا۔ ولی عہد شہزادہ محمد بن سلمان آکھیا جو او وزیر اعظم دے ایں ہفتے دے آخر اچ سرکاری دورہ ریاض دے منتظر ہن جیںدے نال ݙو پاسے دے علاقائی اتے بین الاقوامی معاملیاں تے پوری ڳالھ مہاڑ دا اہم موقع ملسی۔ وزیراعظم خادم الحرمین الشریفین شاہ سلمان بن عبدالعزیز السعود کیتے چنڳیاں خواہشاں پچایاں۔ سعودی ولی عہد و وزیراعظم شہزادہ محمد بن سلمان ایں اوکھے ویلھے اچ قطر نال یکجہتی کیتے اقوام متحدہ دی سلامتی کونسل اتے او آئی سی دے فورم تے پاکستان دیاں بھرپور سفارتی کوششاں اتے وزیراعظم دی قیادت دی تعریف کیتی
