لاہور۔11فروری(اے پی پی)وزیراعظم محمد شہباز شریف آکھیے جو “باب پاکستان” دی تاریخی ڄاہ عظیم قربانیاں دی یاد ݙویندے، پاکستان کوں اوکھ توں کݙھݨ کیتے کٹھے تھی تے محنت کرݨی ہوسی۔ اے ڳالھ انہاں “باب پاکستان” دی تعمیر اتے والٹن روڈ اپ گریڈیشن منصوبیاں دا منݙھ ٻدھݨ ویلھے آکھی۔ تقریب اچ وفاقی وزراء خواجہ سعد رفیق، سردار ایاز صادق، نگران وزیراعلی پنجاب محسن نقوی اتے سی ای او سی بی ڈی پنجاب عمران امین سودھا ٻیاں اہم شخصیات تے افسران موجود ہن۔ وزیراعظم آکھیا جو ہزاراں مہاجرین باب پاکستان دے ڄاہ تے پناہ ڳھدی، والٹن اچ مقامی لوکاں انصار مدینہ آلی اکر مہاجرین کوں ڳل لائے، ݙینھ رات محنت اتے قربانیاں نال ہی ملک ترقی کریسی جیندے کیتے اکوں رل تے کم کرݨا ہوسی، اے ڄاہ آزادی کیتے وݙیاں قربانیاں دی یاد ݙویندے جنہاں مملکت خداداد پاکستان ڳھنݨ کیتے قائد اعظم دی اڳواݨی اچ بے مثال قربانیاں ݙتن اتے رت وھیندے ہوئے جاناں دی پرواہ نا کر تے ہک نویں تاریخ ٻݨائی۔ انہاں آکھیا جو ماضی اچ “باب پاکستان” دے منصؤبے کوں تباہ کیتا ڳئے تے کہیں وی کم نئیں تھیوݨ ݙتا ٻھل اساں آندے ہی ولا ایندا منݙھ ٻدھیے جو اے ہک منصوبہ ہی نئیں ہک وݙا مقصد اے، اوکھ آندے راہندن ٻھل ہمت نئیں سٹݨی چاہیدی، جیکر اساں رل تے مھنت کروں تاں تیکھے ملک اوکھ تؤں نکل آسی۔ ایں موقع تے چیف ایگزیکٹو آفیسر سی بی ڈی پنجاب عمران امین منصوبے بارے بریفنگ ݙتی۔
